Í morgun komu þeir Peter og Jonas eins og talað var um í síðustu viku. Jonas réðist á malarhauginn og byrjaði að flytja hann burtu. Við Peter fórum hins vegar niður í grunninn og ég var handlangarinn hans. Sem handlangari mátti ég hafa mig allan við að vera ekki fyrir honum. Þessi lýsing var knnski að skjóta aðeins yfir markið en ég gat ekki séð að hann væri neinn eftirbátur Anders hvað vinnuhraða áhrærði. Ég spurði hann hvort hann ynni alltaf svona og hann bara játaði því og svo var ekkert meira með það.


Það var þessi svarti dúkur sem við Peter gengum frá og síðan röralögn fyrir vatnið af þakinu. Það er ekki það venjulega að einangra svona utan við grunninn en þar sem ekki var hægt að grafa eins djúpt og æskilegt var, var þetta ákveðið. Byggingarfulltrúinn hefði annars ekki orðið ánægður og ég vil hafa hann góðan og alls ekki skrökva að honum. Ég fæ svarta bletti undir tunguna ef ég skrökva og sem eiginmaður, faðir, afi og ráðgjafi dettur mér ekki í hug að iðka þá lélegu íþrótt.


Þvíþlíkt flínkir sem góðir gröfumenn eru. Ég gat ekki annað en dáðst að því. Akkúrat mátulega mikið á réttan stað og alls ekki að slá skóflunni í hlutina og skemma. Nei, það var eins og Peter bara gæti það ekki þó að hann unni jafn hratt á gröfunni og hann gerði niður í grunninum.


Og þarna var hann lipur líka enda var hann þá búinn að fá vöfflur með sultu og rjóma hjá Valdísi. Það fékk Jónas líka þegar hann kom á vörubílnum úr þriðju ferðinni með afgangsmöl í Syðri malarnámuna í Marieberg. Það er engin mynd af Jonas en Peter sagði að hann hefði skroppið til Tæland í vetur. Var hann að kíkja á stelpurnar spurði Valdís. Nei, svaraði Peter, konan hans var með honum. Nú, er hann giftur svona ungur sagði þá Valdís. Ég satt best að segja leit svona á málið líka. En sannleikurinn er sá að við vorum sjálf nítján ára þegar við giftum okkur.


Svo varð klukkan hálf fimm og þeir kvöddu og fóru. Þá varð mikið hljóðlátt á Sólvöllum og ég fór með hjólbörurnar kringum grunninn og fjarlægði grjót, jafnaði betur mölina og sprautaði af malarsalla sem á stöku stað hafði lent ofan á grunninum. Það verður því góð aðkoma fyrir Anders smið þegar hann kemur til frekari byggingarframkvæmda. Á morgun klukkan hálf átta koma svo Peter og Jonas og þá fara þeir í að grafa skurð frá húsinu fyrir þakrennuvatn og drenvatn frá grunninum. Það er vafasamt að það sé tímabært fyrir Anders að koma fyrr en þeir eru búnir að því. Síðan fara þeir í að grafa fyrir sverari rafmagnskapli og um leið leggjum við niður símaleiðslu. Það er mikið sem hann Anders Borg kemur til leiðar með skattalögunum sínum og það er hægt að blogga oft, oft og lengi um byggingarframkvæmdir á Sólvöllum í Krekklingesókn.