Þegar við Valdís vorum á Íslandi snemma í vor fengum við bók með texta, vísdómsorðum, fyrir hvern dag ársins. Við fengum þessa bók frá henni Fríðu systur og Binnu mágkonu minni. Lengi vel var þessi bók á kommóðu rétt hjá matarborðinu en nú orðið er hún á matarborðinu. Valdís ýtir bókinni oft yfir til mín þegar við borðum, annars mundi ég ekki muna eftir henni nema öðru hvoru. Það er gott að eiga trygga konu. Textinn ofan er frá 29. október. Ég las hann nokkrum sinnum yfir áðan en komst ekki almennilega í samband við hann fyrr en Valdís tók hljóðið af sjónvarpinu. Hún nefnilega getur hlustað á sjónvarpið án þess að það heyrist í því. En þegar það var orðið hljótt í húsinu og ég heyrði ekkert annað en suðið fyrir eyrunum, þá fannst mér sem það skipti ekki máli þó að það væri ekki sólskin eins og höfundurinn segir í sínum djúpvitru orðum.

Hver annars var hann þessi maður. Ég gáði á Wikipedia. Jú, hann varð aðeins 35 ára en honum auðnaðist þó að skrifa mjög mikið og hann er sagður hafa verið náttúruhöfundur. Ég taldi mig svo sem vita hvað orðið náttúruhöfundur (naturskribent) væri en ég sló því líka upp og komst þá að því að ég yrði að fara í háskóla ef ég ætti að skilja allar útskýringar sem fylgdu orðinu. Ég lét því mína eigin vitneskju nægja. Richard átti heima á Englandi og samkvæmt heimildum Wikipedia kom hann einu sinni til Frakklands. Annars er ekki að sjá að hann hafi verið víðförull þó að honum hafi ratast vís orð af munni. "Ekkert er í vændum; það er núna."