Í dag fór hann upp í 30 mm þessi mælir. Ég birti þessa mynd af úrkomumælinum á feisbókinni í gær. Þar talaði ég um úrkomuna, en þessi mynd sýnir meira en úrkomu. Það mætti halda að hún sýni haustlauf líka. Svo var nú reyndar ekki en hins vegar voru stórar bjarkir orðnar mjög vatns þurfi og vissir laufklasar orðnir gulir af þurrki. Svo hreyfði vind og laufið féll til jarðar. Ef ekki verður of þurrt og heitt aftur hverfur þetta lauf bæði af trjánum og af jörðinni og svo verður laufskrúðið fallegt á ný. Þetta hefur gerst áður. Grasflötin grænkar líka óðum og allt er að taka á sig hraustlegan blæ á ný. Það tekur á að vera með Miðjarðarhafshita vikum saman og fá enga rigningu. 

 

Ég skrifaði þetta að mestu í morgun en nú er komið kvöld. Heimsóknin í Fjugesta tókst vel og tiltektin gekk vonum framar. Ég er búinn að horfa á kvikmynd sem mér var gefin fyrir nokkrum vikum, kvikmynd sem er búin að fara sigurför um heiminn meira en flestar aðrar myndir hafa gert. Það var því kominn tími til að ég sæi hana líka og það varð að gefa mér hana svo að ég kæmi því í verk. Það var ekki alveg í gær sem ég gerði þetta síðast og ég ætti nú bara að endurtaka það og líta á þær myndir sem til eru hér á bæ. Ég veit að ég er ekki búinn að sjá allar þær myndir sem til eru. Nú ætla ég að enda þetta kyrrláta kvöld með því að útbúa mér engiferte og fara síðan undir ný viðraðan ullarfeldinn minn. Óli vinur minn mun þá ekki láta mig bíða lengi eftir sér. Það er nú meira hvað hann er tryggur þessi Óli Lokbrá.