Þetta eru brómberjarunnar þarna á myndinni. Ég átti til dæmis eftir að reita frá öllum runnum og blómum sem hér er að finna. Það er að vísu lítið af blómum og það var ég þakklátur fyrir í gær meðan ég hamaðist við að reita. Sem dæmi um annríki ellilífeyrisþegans, þá hafði ég ekki tíma til að taka þessa mynd fyrr en það var orðið dimmt. Að vísu ýkt. Grasið var komið allt of langt upp með runnunum sem segir að jörðin er frjósöm.

 

Núna er það í fyrsta sinn á sumrinu sem ég hef slegið lóðina nákvæmlega eins og ég vil gera. Hún var orðin of loðin sums staðar og ég er búinn að slá suma bletti þrisvar sinnum, bara til að salla niður grasið. Ég vildi ekki raka því saman og bera í burtu, ég vildi að lóðin fengi það til næringar og svo varð. Allt sem ég hef reitt hef ég kastað út á grasið, látið það þorna og svo hef ég farið með sláttuvélina nokkrum sinnum yfir það og þar með hvarf það. Einnig smá moldarkögglar sem fylgdu með. Þegar ég var að reita fann ég að jörðin var enn á ný orðin mjög þurr. Ég er búinn að losa mjög margar garðkönnur í gær og í dag. Það er eins gott að það eru til níu könnur. Ég læt vatnið standa um tíma í könnum því að ég vil ekki vökva með ísköldu vatni.

 

Valgerður bað um að fá að sjá brómberin og fleira af því sem móðir jörð hefur verið að gefa af sér hér í sumar. Ég fer einu sinni til tvisvar sinnum á dag með glas og tíni brómber sem eru að þroskast mjög hratt núna. Á myndinni sést að sum berin eru ekki fullþroskuð. Ef ég geymi þau í birtu hálfan til einn dag verða þau svört. Ég spurði á Facebook í dag hvernig ég ætti að bera mig að því að frysta brómber og ég fékk svar frá gömlum atvinnuliðsforingja. Hann er ábyggilegur maður og ég gerði eins og hann sagði. Um daginn fór ég með brómber til Stokkhólms og Rósa notaði þau í berjapæ sem smakkaðist mjög vel í fimm ára afmæli.